வெறகடுப்பில் தீய்ந்து போன சட்டியைப் போல, வெயில் சூட்டில் கருத்துப் போன முகம். மழை பெய்யாத வன்னிக் காட்டு இலைகளைப் போல், எண்ணெய் தடவாததால், பழுப்பேறிப் போன முடி. கடுமை இருந்தாலும், கள்ளத்தனம் இல்லாத பார்வை. மெலிந்தாலும், பலமுள்ள தேகம். பயாஸுக்கு அடையாளம் சொல்வதென்றால், இப்படித்தான் சொல்ல வேண்டும்.
இந்த பிஸ்னஸ் டீலிங்கில் ஸுபைர் காக்கா முதலில் பயாஸை சந்தித்தது மிகவும் வித்தியாசமான நிகழ்வு. எத்தனையோ பிஸ்னஸ் செய்திருக்கிறார். அவருடைய இருபத்திரண்டு வருட புரோகர் சர்விஸில் அவர் பேசாத கல்யாணமுமில்லை. பார்க்காத பிஸ்னஸும் இல்லை. முச்சந்திக்கு முன்னாலுள்ள மூனேக்கர் காணியை மூனா கானாவுக்கு பேசியதும் அவர்தான். ஆனால், கடைசி மட்டும், கிட்னி பிஸ்னஸ் என்டா அவர் பார்த்ததே இல்லை.
Share
